اِشک

هماهیں کہ ترا دیستگ
منی هوش چہ سرا رَپتگ
مدام بس تئی هیالایاں
من زاناں اِشک منا بیتگ


منارا یاد کایه تو
منی ارواه ءُ ساهه تو
ترا دیستگ من یک رندے
هماهیں مئے دلاهه تو

نسیب ءَ تو منی بات ءِ
هدا ءِ گنجیں سوگات ءِ
ترا هجبر نباں بے هال
منا هردم کہ تو یات ءِ

تئی اِشک ءَ کتگ بیمار
گنوکاں من نباں هچ سار
دعا لوٹاں چہ ربّ ءَ من
بباں بلکیں تئی دلدار


منی اِشک ءَ دگا نیستیں
منا متلب دلا نیستیں
چیا اینچو گروره تو
ترا پہ من وپا نیستیں

منی جان ءُ دل ءِ درمان
منی مهر ءِ گلیں ارمان
وتی هسن ءَ مہ بئے شیدا
بیا گوں من ببه دیوان

تئی مهر ءِ تلبگاراں
دمانے بیا ترا چاراں
نبی سهتے دلا آرام
تئی درد ءُ گماں باراں

منا بے وس کتگ اِشک ءَ
گمانی ڈَس کتگ اِشک ءَ
جهانا هیوک ءُ تهنا
منا بے کس کتگ اِشک ءَ


اکتر بے وس