بے ایمان

ترکش

اے بند ءُ کید ءَ در بیا
واجہ ءَ بل گوں من بیا
بہ دار گوش گپاں منی
گوش اَنت جاھل بِل ءُ بیا
دوزہ پہ ما جنت پہ آ
بھر کنت بہ زان پکت ھدا
نہ من نہ تو نہ ھر کسے
الم ھدا نہ ھر کسے
گڑا بہ سوچ ءُ پگر بہ کن
کارے کن ئے پہ آ بہ کن
زھن ءَ وتی گلام مہ کن
مھلوک ءِ اشرپ ءِ بہ زان
کدی کدی کتاب بہ وان
چم بستک ءَ جنت نہ بیت
انسان بہ بہ ئے جنت رس اِیت
کاپر من آں ناھکی ءِ
کوپگ تئی وھد ، سکی ءِ
گرست ءَ ءُ لھر داتگ اِش
پیلوشتگ اِش مجگ ءَ مئے
مجگ ءِ مھار دست اِش کتگ
سنچ کشتگ ءُ کَل اِش کتگ
ما دان ایں ءُ ریشگ جن ایں
مزن بہ ایں ءُ بر کن ایں
ما سرپدی ءَ سر کن ایں
ما یکی ءَ ھزار کن ایں
گوں وانگ ءُ گوں زانگ ءَ
وت ءَ ھدا ءَ سر کن ایں
چو پرشتگ ءَ ما پاک نہ ایں
چو تو گوش ئے دجال نہ ایں
ھدا ءِ جھگیر نہ ئے
آگاں ھدا ئِے گپ کن ئے
روچ ءَ چتو تو شپ کن ئے
کمے بہ نند ءُ پگر بہ کن
ھبر بہ کن ھدائی ءِ
رند ءَ بہ نند اَمل بہ کن
تو بس مہ نند ءُ گپ مہ کن
ما بر کن ایں ، ما بر کن ایں
ما بر کن ایں ، ما بر کن ایں
ھبر کن ایں
وت ءَ چہ بند ءُ کیداں در کن ایں
امل کن ایں


توار

کارمرز کن اَنت ھدا ءِ نام
گیشتر کن اَنت ءُ سانکلاں
دکان اِش پچ کتگ اد ءَ
کہ زانتے نیست اِنت مردم ءَ
تو زانگ ئے ءُ بس تو ئے
ءُ زانتکار بس تو ئے
اد ءَ کہ جستے نیست اِنت
کربان کن اَنت وت ءَ
دپ پر چہ دروگ
لاپ پر چہ ھرام
دل پر چہ ترس
ءُ مجگ ءِ واب گران
سوب ھمش اِنت کہ نہ گندگ ئے
وتی کش ءُ گور ءَ
بلے شری ءَ لوتگ ئے پہ دنیا ءِ آ سر ءَ
جست مہ کن
کہ اشانی روہ اِنت گلام
گوش ئِے دنیائی تباہ کتگ جاھل ءُ بے ایمان
گوش آں بہ گوش کئے اِنت اد ءَ
جاھل ءُ بے ایمان؟
گوش ئِے جاھل زانت رد انت
بلے سرپد نہ بیت
گوش آں گڑا تو زان ئے رد ئے
ءُ سرپد نہ بہ ئے ؟
گوش ئِے سمبال بہ کن
کہ چے گوشگ ئے
گوش آں شان بل
بہ گوش ایمان دار ءِ نشان چے انت ؟
گوش ئِے کول سمبالگ
ایمان ءِ نشان انت
گوش آں گڑا تو بلاھتریں
بے ایمان ئے
گوش ئِے من نہ آں
اشی ء زانت بس ھدا
گوش آں گڑا تو وت زانگ ئے
ھنچش ھدا
کہ گوشگ ئے کس نہ زانت
ابید چہ ھدا