مئے بلوجستان مھرانی دَیار
نود شنزاتاں بباتیِں گُل بھار
ھالکو شمش اِنت کورانی کَشگ
شیپءُ سرتلاں چراناں سیہ رمگ


علم ءُ زانت ءُ وانگءُ وانوگراں
زالبولءُ مرد رنگیں گوھراں
بزگرءُ دھقان کارءُ جھدکار
جی بلوچستان تی نام ءِ توار 2


زاھدان ءُ نیکشھرءُ ھر دمگ
پلّ ءِ رنگ ءَ زیبداراں ھر کشگ
پلّیں سرحدءَ بگر داں مکراں
گوں تپاک ءُ نرمزاریں مردماں 2


کوہ ءِ تفتان ءِ رفیق، کربان باں
پہ وتی سربازءَ جی ءُ جان باں
ندر باتا په ترا دلگان مئی
تو کلات ءُ سنگر ءُ ایمان می 2



نیبگ ءُ امب اِنت ءُ مچ ءُ لیمبویں
کاپرءُ بان انت جاہ ے تمبویں
شوانگ انت ءُ سیہ پسءُ میشءُ رمگ
پھرہ انت ءُ کورءُ جوءُ مچکدگ 2



بیا بلوچستان ءِ سئیلءَ درکپیں
کنڈگاں بُرزیں تمردی سرکپیں
رسم ءُ دوداں مادری دوران بئیں
کُنگریں بیلاں وتی گندان بئیں 2


باھوءِ پُلکاں چکرّیں سرجنیں
پیشن ءِ زیداں زبادیناں گریں
چول ءُ دریا چابھارءِ دیدگاں
لانچءُ یدّار جانشوانی چیدگاں
رفیق رهچار